في قمّة حُزني من كام يوم
وزادِي .. كان يا شُغل يا نوم
وبتسَــلّى .. بدُعا أو صُوم
واتخفّى ببسمة كدّابـــة
عشان مسمعش كلمة لُوم
وكنت فـ نفسي بَسْتهون .. بكل جُروح
واقول دي مهما كات صعبة .. مسيرها تروح
وغيري جُرحه كان أكبر .. ودلوقتي مهوش مفتوح
واشغِل نفسي بـ فَرَح غيري .. واقول لسه الفرح مسموح
لكن تاني يعود همِّي .. ويسكنني
يزيد دمعي دموع أكتر
يتوه كل الكلام فيّا .. ويخنُقْني
بِوَهْمْ مُمِيت أو أخْطر
ومن ضعفي قعدت ابكي
وعيني مش بتسْتَخْسَر
وخدَّي فارِش لِدَمعِي الوَرد
وقلبي مرَيَّحُه المَنْظَر
ولأن الدّنيا تِضِيق جداً .. وتُفْرَج بَعدها في الحال
ودايماً في الحالات ديّة .. بييجي منها كام مرسال
وانا في حُزني من كام يوم .. في قمة حزني زي ما قلت
لقيت بنوته مالجنة .. بتبكي عشان بتتمرجح!
باباها قام منزّلها .. وسابها تعلّمه يفْرَح
فـ رَسَمِت برجلها النونو .. ان الفرحة خطْوِتها
وان الجري في الساحة .. اصلاً كُل سَعادتها
وحاجة زي مرجيحة .. بيْقَيّد بيها أحلامها
ولأن البنت زي مَلاك .. لا انا اعْرفها ولا تِعْرَفنِي
عنيّا شافتها فابتسمت .. ليها وعينْها كَشَــــفِتْني
مَخَالْش عليها دي البَسْمة .. وخطوة بخطوة وَصَلِتْلِي
ومدت إيدها لأدَيّا .. عشان تدّيني شُوكُولاته
كإن البنت بتشرحلي .. طريق الفرحة ببساطة
كفاية تمشي على قدّك .. وتنهي السّكة بسعادة
في قلب كل مين جنبك .. لأن الفرحة ولّادة
مسيرها في يوم هتوصللك .. سواء منقوشة أوسادة
عقلي وقلبي وصدقها .. ودمعي نشف فـ لحظتها
مفيش قدامي غير اني .. انسى الحزن فـ ساعتها
وبِرَدِّة فعل تلقائي .. بوست إديها و دماغها
قولت اشكرها من قلبي .. وادعيهلها لِطول السّنة
سألت مامتها اسمها ايه ؟ .. قالتلي ان اسمها " هَنَــــــا "
فقولت في نفسي "حتى اسمك " .. ده انتي هديتي مالسما !!
حدث بالفعل ... زينب عيد
حدث بالفعل ... زينب عيد
جميلة يا زوزو سلمت يمناكى
دمتى مبدعة يا هندسة :)
يتوه كل الكلام فيّا .. ويخنُقْني
بِوَهْمْ مُمِيت أو أخْطر
ومن ضعفي قعدت ابكي
وعيني مش بتسْتَخْسَر
وخدَّي فارِش لِدَمعِي الوَرد
وقلبي مرَيَّحُه المَنْظَر
...
ومدت إيدها لأدَيّا .. عشان تدّيني شُوكُولاته
كإن البنت بتشرحلي .. طريق الفرحة ببساطة
كفاية تمشي على قدّك ...
--------
إيه يا بنتي الجمال ده!!
ربنا يسعد أيامك .. وأشوفك على خير قريب ... يا رب <3
يتوه كل الكلام فيّا .. ويخنُقْني
جميل قوي البيت ده..
المفروض إن أنا اسمي عفاف .. ومش عارفة مش ظاهر ليه :D