ببني مدرسة نفسي

عايزين نِعيد ايام زمان 

ايام ما كنّا بنمشي عالكورنيش سوا

فاكرين يوميها ..

كأن الارض كات تــبعنا

نجري فيها .. نمشي فيها ..

والبحر برضه كان بـتاعنا

ونغنّي وصوتنا يبقى عالي

اجدع صحاب ..

فاكرين يا شلة

فاكرين يوميها مشينا فين ؟

وروحنا فين ؟ وكَلْنا ايه ؟

فاكرين قضّينا أجمل وقت في حياتنا 

نروّح ليه ؟

عايزين نعيد ايام زمان

ايام ما كنّا بنمشي عالكورنيش سوا

ايام ما كان السّمر وقت السّهر 

خلّى القمر

ساب اللي دابو في عشقهم

واتدفى من الحضن الي جمعنا هنا

لما اســـــتوى ...

ايام ما كنتي بتضحكي وتتّريقي

علشان بحط الكوفرته عالشباك

لجل ما تحوش الهوا

أيام ما كنتي بتزعلي 

عالـ لأّة لما تلؤ فيكي

زي اما قال دكتور علي

او حد تاني يزعلك

فألاقي حالي مهما كان .. زعلانة جدا

ومهما اكون مليانه علّة 

عندك انتي بكون دوا

فاكرين يا شلة 

الدنيا تِهْرِسْ فيها هَرس

تِقْوَى الرّوابِط فِينا .. جداً

كَمُهندِسين .. كُل واحدة فينا تِرس

اتعشقو بقوة محبّة مطلقة

فاقت حدود الأرض في علوم الهوى

فاكرين محاضرة فترة اولى 

دكتور هشام

لما بنكون سوا ..
 بنروحها امتى ؟

وامتحان الربع تيرم

بتاع دكتور عبد الحميد

بتذاكـروهــولي فين وامتى ؟

فاكرين اللِّيد .. اللي بْهَبَلنَا 

عشان نتِسْت .. اذا كات سليمة ولا لأ
بنعمل ايه ؟

كنا بنوصلها فورا بالباور .. فتقوم تفرقع 

ونقول ساعتها .. كات سليمة

والعوض عليه

فاكرين دموعنا ؟؟

فاكرين جروحنا ؟؟

فاكرين فرحنا بحاجة هبلة ؟!

فاكرين نجاحنا ؟؟

فاكرين جنانا عالشجر

 شبه القرود ؟!!

فاكرين لقانا بعد طول البعد بينّا ؟؟

عيونّا تعمل اجتماع

كلّه شرود

فاكرين ده كله؟!! .. نسيتو ايه ؟!!

والدنيا لسه في صفّنا .. تفتكرو ليه ؟!

عارفين حياتنا زي ايه ؟

انا مش هقول

انا بس بتمنى ..
 نكون سوا جنب الرسول

الحب في الله ضمنا 

يارب تمّم بالقبول

زينب عيد

اهداء لصديقتي الحبيبة مرام جمال
وصديقة الكفاح أمنيه السيد