جوايا كلام محبُوس ... والعقل سجّانُه
وكل كلمة عروس ... متزوّقة عشانُه
والقلب ده موْكوس ... سايقلي في جنانُه
يدُق دَق شاكوش ... مسمارُه راح خانُه
والعقل جيش مرصوص ... مِنَزّل فَرَمانُه
سابلِي بيان منصوص ... وخد ديله في سنانُه
قال : اي كلام محسُوس ... السّجن ده مكانُه
مفتاحه يا فلحوس ... مع "سين" في أحضانُه
وافضل انا المنحوس ... واقف على بِبَانُه
والبيه عامللي "كروز" ... ونايم على ودانُه
مه دُرجُه بقى متْروس ... مفاتيح على شانُه
وانا هنا مفْروس ... والضّحكة في لسانُه
بكْرَه يجينِي مكْبوس ... يفرشلي في حنانُه
يترجّى أسمّي وأدُوس ... وَأواسي أحْزانُه
بس النّصيب مدرُوس ... وهييجي في أوانُه
والصّبر مش بفلوس ... صبر الفؤاد زانُه
ومرارته دي دبّوس ... بتْشَكْشُكْ أَيامُه
وقت الهنا مفهوش ... غير القدر وألْحانُه
وينادي يا نَنّوس ... شوفْت الجَمال ... سبحانه
لينا القَمَر مخصوص ... مفْروش لعِرسَانُه
وانا وانتَ يا محْرُوس ... بالوِدّ سُكّانُه
زينب عيد ... ومحدش يسأل مين "سين"
