ومين ده اللي عمل لأمه
يوم للعيد ؟!!
أكيد كدّاااااااب
ومين أمه مابين إيده
وعنها غاب
ومين أمه تنوّرله يطفّيها
بدون أسباب
ومين عشقه غلب نفسه
وست الكل بتنافسه
وسكّتها بقيت عكسه
فده عيشته هتبقى هباب
ومين عايش فخير خيرها
ومتردّوش عيون غيرها
وميكونلوش بديل ليها
وكل ما عنده في الدنيا
بييجي عندها ويتساب
ومين زيّي ؟!!
بزعّلها و برضيها
وأضحكها بكلام اهبل
واحزاني تبكيها
وبستهبل
وأمثل اننا ببكي
وقال خايفه من الضلمة
وانا برسم على ضمّة
تعيد هيكلتي من تاني
تعلّمني الألف والباء
وتختارلي من الأسماء
اسم جديد
يليق بيّا
يليق بيّا
وبتغنيلي أغنيه
لحد ما انام
وفيها بعيد
يا شايله هموم ما تتقدّر
يا أمي وأم 6 أولاد
يا طيب من مسك ومن عنبر
وروح زهّاد
ومرّة صحيت
لقيت ضلمة
بدون ضمّة
بقيت ابكي بدون تمثيل
والاقي نهار لعيد طالع
وانا لسه
نهاري ليل
ياواهمة القوّة وغنا طالبك
وأصلك عاد
يا غربة يا مضيعه احلى
ما في العبّاد
انا كرهتك
وكرهت الفُرقه من تحتك
فـي عيد الأم يا اخواننا
مافيش أعياد
مافيش أعياد
عشان الغربة تغور عني
وتجمعني مع الأحباب
منا أمّي وفيها الروح
وبيننا حجاب
..........
زينب عيد
عيد الأضحى 2011
عيد الأضحى 2011
جميلة و معبرة جدا بجد :)
جميله جدا :)
حلوة جدا جدا جدا
بجد جامدة جدا جدا وكل سنة وكل ام سعيدة وفرحانة ويارب يخلى لكل واحد امة ويارب يخليلى امى وميحرمنيش منها وفى تطور دائما يا زوبة
هقولها وش بقا :D
رائعة بإحساسها :) شايف إنها متطورة عن اللي قرأته ليكي قبل كدا .. فيها بعض الكسور في الوزن وتصليحها سهل .. إلى الأمام