ولسه العيشة مش كامله
ولسه عايشه انا في النص
ولسه بشوف حاجات توجع
ولسه من غبائي ببص
على البايع وعالشاري
والمربوط وعالسايب
وعالدنيا
اللي بكرهها
عشان عاملاني بلاصي
وبتعبيه هموم تخنق
تقيله تقل يكسرني
وانا عامله الكفاح فاسي
اللي بزرع بيه
ورود تجرح عشان تفتح
عبيرها يفوح .. وانا اقاسي
وقلوب كانت بترسمني .. خرق باليه
وانا احيي الجمال فيها
وأقول أهلي وأقول ناسي
وعاملة إن أنا راضيه
وعاملة إني مش ناقصه ولا حاجة
عشان أدي
تجيبني الدنيا وتودّي
على الله الدنيا تتغير
ويطمر فيها أنفاسي
على الله تحس .. تشوف قهري
مابين قلمي وكراسي
يا بنت الهم ما تسيبي الحياه شوية
ما يمكن فرحة هتخطي
ما يمكن لسه كام ثانيه وتضحكلي
ما يمكن لسه كام ساعه وهنغني
أو يمكن كده قدري !
ودي أيامي في الدنيا
وأنا برضه كده راضيه .. كده راضيه
وعامله فيها مش فاضيه
وعايشه فيها اسكت هس
مفيش حد الحياة أصلا بتضحكله
غير والهم جه في النص
يا دي النيله على الدنيا
اللي خلتنا كتير عالفرح
أنا زهقت الحياة فيكي
ولا هزرع
ولا هستنى منك طرح
انا أصلا منيش فاهمة
ولا هفهم
لا هستنى منك شرح
انا راجعه وانا راضيه
وانا هبله .. وعاملة الأم
وانا بضحك وانا بفرح
وقلب ابيض وخفة دم
وانا مسامحة ومبزعلشي
وانا اسفه متزعلشي
وانا هتلم
وانا حاضر .. وانا طيب
ومشكورة .. وتسلملي
ولو كان اللي جيبته سم
وانا صابرة .. وانا عايشه
بكام ذكرى عشاني وبس
ولسه العيشة مش كامله
ولسه عايشه انا في النص
..
زينب عيد
..
زينب عيد
كُتبت في 15/12/2012
